NAGA CITY- Pigsaysay kan sarong abogado na positibo an pwedeng laoman sa maabot na 2026 sa magigin kamugtakan kan nasyon. Ini makalihis na matapos na an pagtalakay kan Bicameral Conference Committee sa 2026 National Budget.
Sa entrevista kan Bombo Radyo Naga ki Atty Michael Henry Yusingco, Political Analyst, Senior Research Fellow at the Ateneo Policy Center, sinaysay kaini na kun pagbabasehan an kakatapos pa sanang deliberasyon kan bicam igwa sindang mga programa para sa pondo na pigtalaan sa kada sektor kun saen pigsasabi na madara nin benipisyo sa mga Pilipino.
Alagad dae pwedeng ipagkaila na kadakol pa man giraray an nahahadit na an mga alokasyon na ini an maggamit sa pig-aapod na patronage politics siringman sa pork barrel corruption o ayuda politics.
Dugang pa kan nasambitan ng abogado na masakit tubudan na mayong katiwalian o korupsyon an 2026 national budget orog na ta saro ini sa mga isyu na nagtanyog sa gobierno asin sa bilog na nasyon.
Pigpaliwanag pa ni Yusingco na kun mayong nahiling na korupsyon sa mismong pagtalakay kan budget magkakaproblema soboot sa implementasyon.
Huli kaini, kaipuhan na bantayan kan civil society asin kan mga media an implementasyon tanganing masierto na mayong korupsyon na mangyayari.
Mientrastanto, kun hahaputon man an abogado pigsaysay kaini na mas marhay na pirmeng i-livestream an Bicam tanganing madalan kan mga tawo an proseso sa pagbilog kan pondo.
Importante soboot ini tanganing mahiling an behaviour kan mga lehislador kun saen sa huring deliberasyon nahiling na kun an sarong mambabatas mawot magsingit magibo ini nin paagi maski naka-livestreaming.
Sa ngunyan, naglalaom na sana si Yusingco na magigin pabor sa nasyon an binilog na 2026 National budget.
