NAGA CITY- Kinukwestyon ngunyan kan kampo ni Vice President Leni Robredo kun papano naaraman kan kampo ni dating Senador Bongbong Marcos na igwang mga basa suboot na balota na hale sa nagkakapirang mga presinto sa Bato, Camarines Sur.
Sa entrevista kan Bombo Radyo Naga ki Georgina Hernandez, tagapagtaram kan Bicolanang bise presidente, kinukwestyon man suboot ninda kun tano dakol na an naaraman kan lado kan dating senador na sinasabi kan mga ini na bako man parte kan official proceedings sa manual recounts.
Pigtawan doon man ni Hernandez na solamenteng mga representante sana hale sa saindang lado an nagpasiring sa pigkondusir na retrieval process kan mga balota hale sa Camarines Sur kan bulan nin Enero kun kaya kwestyunable suboot kun saen hale an nasambitang mga impormasyon asin kun ano an mga basehan kani.
Sa huri, likay man an lado ni Vice President Robredo na magtao pa nin dugang na detalye manungod sa proceedings para sa manual recount kan Supreme Court na nagtitindog komo Presidential Electoral Tribunal (PET) urog na sa nasambitang mga basang mga balota asin nawawarang mga audit logs sa nagkapirang mga voting precinct sa banwaan nin Bato, Camarines Sur.
