Inanunsyar ni Department of Agriculture (DA) Secretary Francisco Tiu Laurel Jr. na napagdesisyunan kan presenteng administrasyon na i-extend hasta Disyembre an pagpapautob kan import ban kan imported premium rice.
Sigun sa sekretaryo, posible pang ma-extender nin hasta sa katapusan kan taon an pagpapautob nin import ban sa mga nasambitan ng produkto depende sa sitwasyon asin man magin hiro kan presyo kan mga paroy.
Sa ngunyan kaya nagbagsak na naman an presyo kan bentahan nin paroy kan mga lokal na paraoma kaya man sa nagin pag-ulay ni Tiu Laurel Jr. ki Presidente Ferdinand Marcos Jr., pirang mga lakdang an soboot naaprubaran kan Presidente tangani gamiton tangani malikayan an sobrang habababang presyo kan mga paroy.
Nagkapira sa mga ini an dagusang pagbabawal sa mga government offices na magbakal nin mga imported premium rice kabali na digde an mga lokal na gobyerno tangani matabangan an mga lokal na paraoma sa nayon asin dae maging bagsak presyo an bentahan kan paroy sa merkado.
Kasunod kaini, nakaambang man na ilangkaw na liwat an taripa sa bagas makalihis kan pagpapautob nin import ban tanganmi gibuhong mas stable an presyo kan bagas asin mapakusog an pagbakal sa mga lokal na bagas.
Igwa nin nakapreparar na Executive Order na para sa pagtakda nin floor price kan mga paroy tangani matawan nin prayoridad an mga lokal na paraoma kumparar sa mga imported na bagas.
Mientrastanto, igwa man nin EO para sa emergency procurement kan paroy asin dugang na mga warehouses para sa mga aanihon para sa mas magayon na pagbakal nin paroy gikan sa mga local rice farmers.
Padagos man na nagkakasa nin mga paglilibot asin pagpapautob nin price monitoring an departamento katabang an Department of Trade and Industry (DTI) tangani masierto asin man mabantayan an mga magigin hiro kan presyo kan mga pangenot na barakalon orog na an bagas sa merkado.
