NAGA CITY- Naka-activate na an Incident Management team kan siyudad nin Naga puon kasubagong alas 7 nin aga hasta sa aga man nin alas 7 nin aga katakod kan pigbabantayan na si bagyong Kristine.
Sa nagin paghampang sa mga kagawad kan media ni Renne Gumba, Director kan PSO-Naga, sinaysay kaini na 24 oras na mabantay an saindang team tanganing maasikaso asin mamonitor an bilog na Naga City siringman matawan nin asistensiya an siisay man na residentes na mangaipuhan kaini.
Sigun pa ki Gumba, padagos an saindang pagmonitor sa mga nasa low lying areas orog na an mga nasa critical level na mga lugar.
Dugang pa kan opisyal, piglalaoman na mapautob nin force evacuation alagad nakadepende soboot ini sa kamugtakan kan panahon.
Mientrastanto, pigsaysay man ni PCol. Erwin Rebellon, City Director kan NCPO na kasuudma pa sana nin bangi nakapreparar na an saindang lado para sa nasambitan ng bagyo.
Sa presente, igwa soboot nakadeploy na walong team sa mga strategical na areas kan siyudad asin matinir ini hasta dae nagmamarhay an panahon.
Dugang pa kan opisyal, nagtatarabangan man an gabos na opisina kan Naga City tanganing magin salbado an gabos sa panahon na igwang pigbabantayan na bagyo.
