NAGA CITY- Sa karsel an bagsak nin sarong incumbent barangay kagawad makalihis na makuanan nin iligal na droga asin badil sa pigkondusir na operasyon kan mga otoridad sa banwaan nin Sipocot, Camarines Sur.
Binisto an suspek na si Ariel Mirabueno alyas Ayie, 37-anyos asin presidenteng kagawad kan barangay Cabuyao.
Sigon ki SPO3 Albert Joven, hale sa Sipocot PNP, sinaysay kaini na nadakop an suspek sa lindong kan search warrant laban saiya para sa pagbalgar sa RA 9165 o an comprehensive dangerous drugs act of 2002 asin RA 10591 o an Comprehensive Firearms and Ammunition Regulation Act.
Nakumpiskar sa suspek an pitong sachet na naglalaog nin pigtutubudang shabu, mga drug paraphernalia, sarong caliber 38 revolver o inaapod man na paltik asin mga bala.
Basado sa impormasyon na kapot kan mga kapulisan, si Mirabueno an pigkokonsiderar na ikatolo sa listahan kan provincial drug watchlist sa Camarines Sur.
Sigon pa ki Joven, nagpapabakal man suboot an nasambitang kagawad nin iligal na droga sa saindang mismong barangay.
Nagtitinir na ngonyan sa kostudiya kan mga otoridad an suspetsado asin nasunadan naman ini nin suruon-suon na mga kaso.
