Kinalampag ni Senator Joel Villanueva an gobyerno na magkaigwa nin inter-agency coordination kan mga ahensiya tangani matawan nin solusyon an naglalalang sitwasyon nin baha sa nasyon.
Pigtuyaw kan senador an garu dae man mamatean na ₱1.4 billion kada aldaw na piggagastos kan gobyerno para sa flood control programs asin taon-taon nagdadakula an ginagastos kan gobyerno tangani solusyunan an baha.
Kaipuhan na nin inter-agency coordination kan manlaen-laeng ahensya siring kan Department of Public Works and Highways (DPWH), Department of Environment and Natural Resources (DENR) asin Metropolitan Manila Development Authority (MMDA) para sa sarong whole-of-government approach na magtaong solusyon sa baha sa nasyon.
Pinatutukan man kan senador an problema sa waste management na dakulang rason man sa paglala kan sitwasyon.
Dugang pa ni Villanueva, kun may dapat mang busision an Kongreso, ini an kun akma asin man kun ginigubo talaga an mga rekomendasyon kan milyon-milyong kantidad nin feasibility studies asin man kun epektibo man an mga disenyo na ipinapautob kan gobyerno.
Mientrastanto, inabisuhan man ni Senator Loren Legarda an publiko sa mga pwedeng magibo tangani makalikay sa baha asin an pagtatarabangan kan gabos sa tahaw kan naeeksperyensyahang makusog na uran dara kan habagat.
Kabali na sa mga paagi na ini iyo an striktong implementasyon kan Ecological Solid Waste Management Act, asin magkaigwa nin disiplina sa pagtatapok nin basura; bakong pagtugdok nin mga establisyemento harani sa mga kanal, estero asin mga waterways; pagkukusa na maglinig nin mga estero asin kanal na harani sa saindang mga lugar.
