Pigsayumahan kan 5 panel judges kan International Criminal Court (ICC) Appeals Chamber sa paagi kan “unanimous” decision an kahagadan na interim release o paramientras pagpalibre ni dating Presidente Rodrigo Duterte ngunyan na biyernes, Nobiyembre 28.
Pigbasa ni ICC Appeals Chamber Presiding Judge Luz del Carmen Ibáñez Carranza an nasambitan na desisyon.
Marurumduman, naenot ng pigsayumahan kan ICC Pre-Trial Chamber I an request kan dating Presidente para sa interim release, kun saen nahihiling na kaipuhan magpadagos an pagkakulong sa dating Presidente kan Pilipinas.
Sa apelar kan kampo kan dating Presidente, pigtawan duon ninda na bigo soboot an Pre-Trial Chamber I na may flight risk o may peligro na takasan kan dating Presidente an paguusig sa crimes against humanity kontra sa saiya.
Enot na digde, nag-waive an dating Presidente kan saiyang karapatan na magin present sa pagbasa kan hatol sa saiyang interim release request asin pigsugo an saiyang lead counsel na si Nicholas Kaufman na representante sa saiya asin dangugon an desisyon kan Appeals Chamber.
