NAGA CITY- Kasado na an ipapautob na security measures para sa ikukundusir na aktibidad kasabay sa selebrasyon kan Chinese New Year sa siyudad nin Naga.
Sa entrevista kan Bombo Radyo Naga ki PLTCOL. Chester Pomar, Public Information Officer kan Naga City Police Office, sinaysay kaini na magkakaigwa nin pagsarado kan tinampo sa mga rutang aagihan kan parade antes mag-abot an alas 4 nin hapon sa aga, Enero 29, 2025.
An nasambitan ng ruta an mapuon sa sarong mall sa siyudad, maagi sa Panganiban, Centro asin mabalik sa may parte kan General Luna St. hasta sa Plaza Quezon.
Katakod kaini, igwang ide-deploy na mga personahe an NCPO na kinababalihan kan mga naka-uniporme asin dae naka-uniporme na mga kapulisan.
Katakod digde, pig-enkaminar man kan opisyal an publiko orog na an igwang mga kalakawan sa Naga City na amay mag-asiko kan saindang mga katuyuhan tanganing dae maipit sa piglalaoman na magabat na trapiko asin mga tawong mahiling sa aktibidad.
Apwera dide, pig-abisuhan man ni Pomar an gabos na dae pwedeng magdara nin deadly weapon, mga badil apwera kun igwang written authorizaton asin iba pang mga ipinagbabawal.
Mientrastanto, liwat man na piglinaw kan opisyal na mayong katotoohan an nagkukuriyat na bareta dapit sa soboot insidente kan pagpurbar na pagkidnap sa siyudad nin Naga.
Nagtao na nin deriktiba an City Director na hilingon kun ano an pwedeng ikaso para sa mga tawong nagpapakuriyat nin fake news asin nagraraot sa imahe kan siyudad.
