Pinahimutikan ni Philippine Navy Spokesperson for the West Philippine Sea Rear Admiral Roy Vincent Trinidad an mga bareta asin pahayag kan China na nagsagibo sinda nin joint sea asin air patrols sa katubigan kan West Philippine Sea.
Sa sarong pulong balitaan sa mismong kampo kan Armed Forces of the Philippines (AFP), pigtawan duon ni Trinidad na mayo sindang na-monitor na ano man na mga koordinasyon gikan sa China manungod sa nasambitan ng pagsasagibo nin patrolya sa WPS.
Sulamenteng mga illegal na presenya sana kan Chinese Communist Party an saindang nanutaran sa WPS mantang nagsasagibo nin maritime exercises an Pilipinas kaiba an Japanese Navy.
Kasunod kaini, pig apod man ni Trinidad na sarong paagi kan pagpapakuriyat kan mga salang impormasyon asin pagpapalakop nin fake news an mga nagin pahayag na ini kan China.
Ini an ginigibo sana soboot kan China tangani porbarang mabago kan China an mga internal asin domestic na naratibo kan nasambitan ng nasyon sa saindang mga claims sa mga teritoryo kan Pilipinas.
Hurot pa ni Trinidad, dae man totoo na nang-iinkaminar asin nangiimbitar an Pilipinas nin ibang nasyon tangani makisumaro sa mga maritime asin joint exercises sa WPS.
Liwat man na inihayag asin nanindugan si Trinidad na an illegal na mismong presensya asin mga lunadang pandagat kan China an dapat ng maghali asin magluwas kan exclusive economic zone (EEZ) kan nasyon.
Pigsierto man kan Philippine Navy asin kan Armed Forces of the Philippines na sinda an padagos na naninindugan na maprotehiran an mga teritoryo kan Pilipinas sa katubigan kan WPS asin sisiguraduhong dae maaapektaran an soberanya kan Pilipinas.
