Dae gayo soboot nahahadit si House Ways and Means Committee Chairman asin Albay Representative Joey Salceda sa ipinataw na taripa para sa mga ini-export na produkto kan Pilipinas pasiring sa Estados Unidos.
Sigun ki Salceda, karapatan kan sarong malayang nasyon kun ano an mawot nindang ipautob na trade policy.
Paliwanag kan ekonomistan lehislador, kun hihilingon man soboot, mas hababa an 17% na taripang ipinataw sa Pilipinas, kumparar sa mga kakumpetisyon kan nasyon kaya man igwa pa man soboot nin oportunidad para sa lado kan mga pinoy.
Sinabi ni Salceda na haros nasurpresa ini sa hababang taripa na ipinataw kan US sa Pilipinas.
Siringpaman pigpatanidan ni Salceda an Department of Trade and Industry (DTI) na magkaigwa nin komprehensibong estratehiya sa posibleng epekto kaini sa ekonomiya, partikularmente sa textile asin man footwear sector.
Kabali soboot sa mga pwedeng tabang an ayuda, job retraining asin man unemployment assistance enkaso igwa nin mawaran nin trabaho sa nasambitang mga sektor.
Tinukoy man kan economist solon na an pinaka huma para sa pagiging competitive kan Philippine export iyo an bako mismong taripa kundi an halangkaw na singil sa kuryente asin pagtutugdok nin negosyo sa nasyon.
Ini soboot an saro sa mga insentibo na sinimbagan kan CREATE MORE Act alagad kaipuhan pa maggibo nin pinaka marahay na lakdang tangani ini masolusyunan.
