Kinumpirmar ni Iran Supreme Leader Ayatollah Ali Khamenei kan nakalihis na Sabado (local time) na ribu-ribong tawo na an binawian nin buhay sa nakalihis na protesta sa Iran, asin pigladawan an nagkapirang bagadan komo sarong “inhuman, savage manner”.
An madahas na demonstrasyon an kasunod kan mga protesta na nagpuon kan nakalihis na Disyembre 28 huli sa problemang pang-ekonomiya kan Iran asin pangapodan na wakasan na an pamamayo ni Khamenei.
Sigun sa US-based Iranian Human Rights Activists News Agency (HRANA), dae mababa sa 3,090 katao an binawian nin buhay sa mahewasang protesta, mantang igwang nagkapirang aktibistang grupo an nagtataya nin mas halangkaw na numero.
Sa ibong na banda, pigbabasol man ni Khamenei an Estados Unidos sa kariribokan, inapod si U.S. President Donald Trump na “criminal” asin sinaysay na an obheto kan Amerika an “halunon an Iran”.
Dugang kan Supreme Leader na dapat panimbagon an US sa mga kariribokan sa Iran.
Ginibo ni Khamenei an pahayag makalihis na enot isuhestiyon ni Trump na magpadagos sa protesta an mga Iranians kasunod kan bantang masimbag an Amerika kun mapadagos an pamamaslang kan Iranian security forces.
Kan nakalihis na Miyerkules, sinaysay ni Trump na nadangog kaini na nagpundo na an paggadan sa Iran, alagad dae kaini piggilid an posibleng aksiyon sa futuro.
Inapod kan gobyerno kan Iran an mga demonstrasyon komo “riots” na pinuonan soboot kan mga kaiwal kan nasyon huli digde napiritan soboot na maggamit an security forces nin marahas na pwersa, kun saen sigun sa report igwang mga video kan pambabadil.
Mientrastanto, nagtitinir na 2% sana kan normal an internet connectivity sa Iran, sigun sa cyber monitor na NetBlocks.
Alagad maski nagbaba an mga report kan kariribokan kan mga nakalihis na aldaw, dipisil pa man na tyansahon an sitwasyon huli sa limitadong komunikasyon.
Sigun man sa US State Department, pigreport na nagpepreparar na an Iran nin mga opsyon tanganing atakihon an mga American bases alagad patanid kan US, anuman na pag-atake, sisimbagon nin “a very, very powerful force.”
Abiso ka Washington sa Tehran “not to play games with President Trump.”Pigtawan-duon kan partial withdrawal kan US asin UK an personnel kaini sa Al-Udeid air base sa Qatar komo precautionary measure.
