Nagtapos komo pang-13 sa sarong fencing tournament sa France an lead vocalist kan legendary heavy metal band na Iron Maiden na si Bruce Dickinson.
Puon pa kaya kan aki ini, paborito na Dickinson an sports na fencing kaya nagin maogma na ini kan magin pang-13 sa kabilogang 31 na parakawat sa veterans category kan Circuit Europeen 2025.
Dinaog ini ni dating Olympic gold medalist Pascal Jolyot.An 66-anyos na singer an dating nag-ensayo sa British Olympic fencing squad kan nakalihis na taong-1980.
Apwera pa kaya sa pagkanta, igwa man ining sadiring pagibuhan kan beer asin nagin piloto man na nakapagpalupad kan commercial flight nin 7,500 na oras.
Saro sana si Dickinson sa mga singer na nahihilig sa sports siring kan latin artist na si Julio Iglesia na nagkawat nin soccer sa Real Madrid asin singer na si Jack Johnson na nagin pinaka-joven na imbitado sa finals kan Pipeline Masters surfing tournament sa Hawaii sa edad na 17.
