Nagdeklarar an Israel nin paramientras na pag-untok sa opensiba sa nagkapirang parte kan Gaza tanganing tugotan na makaagi an United Nations (UN) asin humanitarian aid convoys, sa tahaw kan naglalalang krisis sa kagutoman sa rehiyon.
Sigun sa militar kan Israel, mapuon an pig-aapod na “tactical pause” ara-aldaw puon ala-10:00 nin aga hasta alas-8:00 nin banggi sa mga lugar na mayong nang aktibong operasyon kan soldados, siring kan Al-Mawasi, Deir el-Balah, asin Gaza City.
Pigtugogan man an paglaog kan mga secure routes sa paghahatod nin pagkakan asin bulong.
Kasabay kaini, nagsagibo na man an Israel nin mga airdrop kan pagkakan, mantang an United Arab Emirates asin United Kingdom an nagpahayg nin suporta asin liwat na paghatod nin tabang gikan sa Gaza.
Siring man, duda an nagkapirang humanitarian groups sa epekto kaini, asin pighurot na dae bastante an air drops tanganing masibagan an mahewas na kagutoman.
Sa ibong kan mga lakdang, labi 50 katawo pa man an naireport na binawian nin buhay kan nakalihis na Sabado sa mga airstrike asin pambabadil soboot kan Israel, sigun sa Palestinian civil defense.
Naghigot pa an tensiyon makalihis na harangon kan mga soldados na Israeli an sarong barko kan pro-Palestinian activists na nagporbar pasaon an naval blockade.
Marurumduman na an kagutoman na naeeksperyensiyahan sa Gaza an naglala makalihis an total blockade na ipinataw kan Israel kan nakalihis na Marso kan taong ini kun saen nagin pasakitan an paglaog kan land laid asin kadakol na lugar an dae maabot huli sa mahigot na kotrol kan militar.