Nangapudan si Israeli Prime Minister Benjamin Netanyahu kan nakalihis na aldaw nin Lunes sa mga residente kan Gaza City na mag ebakwar mantang pinahigot kan Israel an pambobomba komo preparasyon sa paglusob sa pinakadakulang syudad kan enclave.
Susog sa civil defense kan Gaza na 39 an binawian nin buhay sa aldaw na nasambitan, kabali na an 25 katawo sa Gaza City, sa ibong kan nagin pangapudan kan mga nasyong Kanluranin asin man aid groups na iuntok an pag-atake.
Sa Jerusalem man, duwang Palestinian gunmen an nambadil sa sarong bus, ikinagadan kan nasa anom katawo antes man na magadan ini kan mga awtoridad.
Sigun ki Netanyahu, an nasambitan ng mga nanggagadan an nagpahigot pa kan saindang detirminasyon na labanan pa an terorismk.
Nagpatanid pa man si Israeli Defense Minister Israel Katz na dapat palayaon kan Hamas an mga bihag asin man isuko an armas o dagusang mawasak asin maubos, na inapod kaining “final warning.”
Sigun sa Government Media Office kan Gaza, 700 aldaw nin pambobomba kan Israel an nagraot sa haros 90% kan imprastruktura kan enclave asin man nagkawsa nin labi sa $68 bilyong pagkalugi.
Labi sa 73,700 an gadan o nawawara, kabali na an 20,000 kaakian asin man 12,500 kababaihan.
Tinanggal din sa civil registry ang 2,700 pamilya. Kaiba sa mga binawian nin buhay iyo an 1,670 health workers, 248 mamamahayag, 139 miyembro kan civil defense, asin 173 kawani kan munisipyo.
Labi man sa 162,000 an irido, kadakol pa an nagsapo nin permanenteng danyos siring na sana kan amputasyon asin pagkabuta. Nawasak man an 38 ospital, 833 mosque, asin 163 eskwelahan.
Inakusaran kan Gaza an Israel nin sapiritang pagpapa ebakwar, paggamit kan gutom komo sandata, asin man pagpugol sa paglaog kan tabang para sa 2.4 milyong residente—labi sa kabanga an mga kaakian—na ngunyan an nasa bingit kan taggutom.
Itinukdo kan Gaza media office an Israel asin mga kaalyado kaini, partikular an US, komo responsable sa danyos asin man nangapudan sa mga nasyong Arabo, Islamiko, asin sa UN na wakasan an pag-atake, halion an blockade, asin papanimbagon an mga lider kan Israel.
Naglaog na sa ika-700 aldaw an giyera kan Israel, kun saen nagluwas na nin arrest warrant an International Criminal Court kontra ki Prime Minister Benjamin Netanyahu asin man dating Defense Minister Yoav Gallant.
Kahampang man kan Israel an kaso kan genocide sa International Court of Justice.
