Makalihis manutaran na magkaputan nin kamot sa sarong fun run, pigsayuma kan aktor na si Jameson Blake an mga urulay-ulay na igwa nin relasyon sinda kan aktres na si Barbie Forteza.
Sa episode kan vlog ni Ogie Diaz kan nakalihis na Hulyo 4, pigheras kaini an mensahe ni Blake kun saen nilinaw kan aktor na mayo sindang relasyon ni Forteza.
Sigun pa ki Blake, inalalayan sana kaini si Forteza paluwas nin event huli sa dakol kan tao. Nag-ugat an espekulasyon makalihis sindang mahiling na magkaibahan sa sarong fun run sa Pampanga kan bulan nin Hunyo, asin naenot nagkaibahan man sa “Takbo para sa Pelikulang Pilipino” kan bulan man nin Mayo.
Sa ngunyan, dae pa nagtatao nin pahayag si Forteza manungod sa isyu.
An duwa an magtatambal sa papaabuton na film na “Kontrabida Academy” kaiba si Eugene Domingo.
Mayo pang anunsyar dapit sa petsa kan pagpapaluwas asin detalye nin storya.
Mientrastanto, nagin sentro kan urulay man si Forteza makalihis mahiling na kaibahan an ex-boyfriend na si Jak Roberto sa sarong event kan nakalihis na Hunyo.
Nilinaw kan aktres na habo na kaining pag-ulayan pa an saindang pagsusuhayan komo respeto sa saindang nakaagi.
