Mapautob an Japan nin mas mahigot na panundunan para sa mga dayuhang mawot magnegosyo sa saindang nasyon.
Basado sa dokumentong pigluwas kan Ministry of Justice, piglangkaw sa 30 million yen o poco mas o menos P11.9 million an kinakaipuhan na kapital para sa ”business and management visa” —anom na beses na mas halangkaw kaysa sa presenteng 5 million yen na kapital.
Kabali man sa mga bagong panundon an pag-require kan maski sarong full-time na empleyado sa Japan.
An lakdang na ini an kasunod sa resulta kan eleksyo kan nakalihis na Hulyo kun saen nagkusog an suporta para sa sarong oposisyong partido na dae uyon sa imigrasyon, na nagin rason kan pagkawara kan mayorya nin ruling coalition.
Madurar an konsultasyong publiko hasta Setyembre 24 asin piglalaoman na ipapautob an mga pagbabago sa Oktubre.
Sa presente, poco mas o menos 41,600 katawo an igwang kapot kan siring na visa sa Japan, kun saen labi sa kabanga an mga Chinese national, sigun sa datos kan immigration.
