Presenteng hiring an Japan nin nurses asin certified care workers.
Sa sarong statement, sinaysay kan Embahada kan Japan sa Manila na nagpapadagos an recruitment para sa 50 nurses asin 300 careworkers.
An nasambitan ng recruitment an nasa irarom kan Japan-Philippines Economic Partnership Agreement. Ipoproseso man kan Department of Migrant Workers sa pakikipagtabangan sa Japan International Corporation of Welfare Services an mga aplikasyon.
An mga kwalipikadong nurses na pwedeng mag-apply an dapat an nakapagtapos nin Bachelor of Science in Nursing na igwang active Professional Regulation Commission license, igwang minimum na 3 taong work experience sa ospital, clinic, o health center asin dapat na willing magtrabaho asin mag-adal sa Japan komo nurse tanganing makakua nin national license.
Para man sa careworker, dapat na nakapagtapos nin Bachelor of Science in Nursing igwa man o mayong PRC license, nakapagtapos nin 4 na taong-kurso alagad igwang National Certificate II in Caregiving (NCII) gikan sa TESDA asin dapat na committed na magtrabaho asin mag-adal sa Japan komo candidate para sa careworker tanganing makakua nin National License.
Sigun sa Embahada, an mga makakaresebir na aplikante an kaipuhan magsairarom sa Japanese language training sa laog nin 6 na bulan sa Pilipinas asin 6 na bulan sa Japan.
Ini an libre asin itatao sa kasagsagan kan training an aldawang allowance. Para sa mga interesadong mag-apply, magsumiter sana sa DMW Regional Offices o Central Office nin detalyadong resume, clear photocopies kan transcript of records, college diploma, updated Certificate of Employment, Japanese Language Training Certificate kun igwa, valid TESDA certificate (kung bakong BS Nursing graduate), valid passport, valid clearance gikan sa National Bureau of Investigation, Pre-Employment Orientation Seminar certificate, asin printed copy kan Workers Information Sheet/e-Registration.
Ang deadline kan pagsusumiter kan aplikasyon an hasta sa Abril 4.
