Padagos an pamamayagpag kan Pinoy cue master sa world stage makalihis na idugang si Jeffrey Ignacio sa listahan kan mga bagong kampeon.
Si Ignacio an naghade sa ika-37 na Japan Open men’s 10-ball makalihis na malampasan si Lin Tsung-Han kan Chinese-Taipei sa paagi nin 8-3 na desisyon.
Si Ignacio nakakua nin dakulang $9,400 na premyo o katumbas nin labing P500,000 na premyong kwarta.Nakaabot si Ignacio sa finals kan daogon niya an Japanese bet na si Satoshi Kawabata sa semifinals sa paagi kan 7-5 na desisyon.
Ini man an nagtao nin inspirasyon sa mga nagtutukaw na kampeon sa kinaban na si Rubilen Amit asin Johann Chua na parehong bago pa sana sa kapangganahan sa saindang kanya-kanyang mga laban.
Marurumduman na si Amit an nagpoon kaini kan siya nanggana kan kampeonato sa 2024 Massé WPA Women’s World 9-Ball Championship kan Miyerkules.
Sinundan ini ni Chua nin saro pang kampeonato para sa Pilipinas makalihis na manggana sa China Open 9-Ball sa Shanghai, China kan Biyernes.
Si Amit makikipagkumpetensya sa Pudong WPA 9 Ball China Open na gigibuhon sa Shanghai, China ngunyan na semana.
