Pigheras kan singer na si Justin Bieber sa saiyang social media account an saiyang labing kamunduan sa pagkagadan kan saiyang Lolo na si Bruce Dale.
Sa sarong post, ipinahiling ni Justin an ladawan kaibahan an saiyang Lolo na pano soboot nin magayon na memorya.
Katakod kaini, sinaysay kan nasambitan ng singer na igwa nang mabantay sa sainda sa langit asin maabot soboot an panahon na liwat sindang magkakaibahan.
Pigsierto man kan hollywood star na matinir an magagayon na memorya kan saiyang Lolo asin padagos na mabubuhay an legasiya kaini.
Sigun sa report, si Dale an nagtalikod sa kinaban kan April 24 sa Rotary Hospice sa Stratford, Perth, ini an 80-anyos.
Marurumduman an Lolo ni Justin an nagluwas sa 2011 documentary na Never Say Never mantang kan 2018 sa sarong entrevista pigsaysay kaini an saiyang pusog na pagsuporta sa maku-apo.
