NAGA CITY- Nagpapadagos pa man giraray an kadahasan kan mga nagpoprotesta asin mga gang member sa nasyon kan Haiti maski pa nagbaba na sa pwesto an saindang prime minister.
Sa report ni Bombo International News Correspondent Nene Sylvain, harani soboot an area na pinangyayarihan kan kadahasan sa Filipino community sa lugar, alagad medyo harayo ini sa saiyang pig-iistaran.
Manunungod man soboot sa mapa-repatriate, kan nakaaging bulan 35 soboot an nag-boluntaryo alagad ngunyang semana, 63 nin OFWS an kumpirmado nang mapa-repatriate.
Sigun ki Sylvain, kadakul nin mga gangs sa Haiti, siring kan G9 asin Vitel’Homme, kun saen ini man an pig-aapod na “gangsterized,” nin huli ta dai an mga ini kaya kan kapulisan, maski uru-aldaw ninda ining pig-hihigosan na labanan.
Dugang pa kaini, nagpuon an istorya kan kariribokan kan pig-gadan an Presidente kan Haiti kan taong 2021, kun saen pirang aldaw soboot pakatapos nag-deklarar si Ariel Henry- sarong Haitian na politiko, na ini na an magigin Prime Minister kan nasambitan ng nasyon.
Dai soboot ini nauyonan kan publiko sa naumbitan ng nasyon, nin huli sa kawaran nin seguridad, pagigin laganap kan kagutuman, asin kasakitan digdi. Huli digdi, kun kaya nagkusog an mga gang sa nasyon.
Apwera pa digdi, laganap man an kidnapping, hold-ups, panlulugos, asin pag-ransack kan mga gangs sa mga negosyo sa lugar.
An Haiti man soboot an pinakatios na nasyon sa western hemisphere, asin an kakulangan nin seguridad igdi an rason kun tano haros mayong nag-iinvest sa nasyon.
