Lubog na sa tubig baha an kadakol na mga barangay sa probinsya nin Cagayan kasunod kan mahiwasang na pag-uran dara kan bagyong Nika.
Segun sa Provincial Government of Cagayan, nag-apaw na an Cagayan River asin nagdara nin baha sa dakol na barangay sa syudad nin Tuguegarao asin sa mga munisipyo nin Alcala, Amulung, Baggao, Enrile, asin sa banwaan nin Solana sa habagatan kan Cagayan.
Nakaabot na man an tubig baha sa mga coastal towns kan Cagayan siring kan Buguey, Gonzaga, Aparri, asin iba pang lugar.
Kan nakalihis na aldaw nin Lunes nagkaigwa man nin flash flood sa banwaan nin Gonzaga, kun saen dakul na mga harong an pigtutubudan na na-atong asin naraot huli sa nagraragasang tubig baha.
Dakol man na tinampo sa Cagayan an dae na naagihan huli sa padagos na paglangkaw kan tubig.
Kabali digdi an nagkapirang tinampo sa mga banwaan kan Sto. Nino, Baggao, Alcala, Enrile, Piat, Solana, asin Tuguegarao City.
Sa syudad man kan Tuguegarao, igwa nin inisyal na 21 brgys an nalubog sa tubig baha asin labi sa tolong indibidwal an nag-ebakwar.
Padagos pang pig-eebakwar an mga residentes huli ta padagos an pagtaas kan lebel kan tubig gikan sa Cagayan River, an pinakadakulang salog sa bilog na nasyon.
