Naga City-Sunod sunod na nagpaabot nin pagbati asin kaugmahan an iba pang mga nasyon makalihis an dagusang pag-dismiss kan korte sa huring drug case ni dating Senadora Leila De Lima.
Apwera sa Estados Unidos na tulos na nagpaluwas nin pagbati makalihis an desisyon kan korte, nagpaluwas man nin kaugmahan an mga ambassador kan European Union, Canada, Germany, UK, Australia, Netherlands, asin France.
Sigun ki EU ambassador Luc Veron, an desisyon kan korte maitatrato na kapangganahan kan hustisya.
Nauugma soboot an 26-member states kan EU sa nagin desisyon na nagpapahiling nin hustisya.
Sigun man ki Canadian Ambassador David Hartmann, welcome sa saiyang nasyon an nagin desisyon kan korte.
Importante soboot an transparency, ebidensya, asin kalayaan kan judiciary para sa pagtao nin hustisya.
Pig-apod man ni German Ambassador Andreas Pfaffern an desisyon komo gana para sa hustisya asin pag-iral kan ley.
Kasabay kaini, nangapudan an ambassador sa gobyerno kan Pilipinas na tulos resolbaran gabos na kaso nin extrajudicial killings asin pasimbagon an mga nasa likod kaini.
