NAGA CITY- Binukasan kan National Irrigation Administration-Bicol an Kadiwa ng Pangulo sa NIA ngunyan na aldaw, Oktubre 29, 2024 para sa gabos na residentes na mawot magbakal nin baratong bagas.
Sa entrevista kan Bombo Radyo Naga ki Maria Cleofe B. Baraero, Public Relations Officer kan NIA-Region V, sinaysay kaini na piglalaoman kan saindang opisina na mapakol sa 800-1K na pigsasampulong kilo kan bagas an pwedeng maipabakal.
Pigbukasan an nasambitan ng Kadiwa ng Pangulo sa NIA komo pagsunod sa kasuguan ni Presidente Ferdinand Bongbong Marcos Jr. makalihis an pagbisita kaini sa Bicol Region na kaipuhan igwang mabakal na baratong bagas an mga tawo na naapektaran kan Bagyong Kristine. Ini an makalihis man na mapag-araman na dikit an suplay kan bagas na nag-aabot asin halangkaw man an pabakal kan iba na nagpapakol sa P65 kada kilo.
Katakod digde, an Kadiwa ng Pangulo sa NIA, bukas para sa gabos na tawo bako sana sa mga vulnerable sectors tanganing makabakal an mga ini nin baratong bagas na nagkakantedad sa P35 kada kilo. An suplay kan bagas na pigpabakal iyo man an well-milled rice asin gikan sa contract farming program kan NIA partikularmente an mga suplay na naisalbar o available pa.
Dugang pa kan opisyal, first come first serve basis an pigpautob kan NIA. Mientrastanto, pigsierto pa man kan NIA an asistensiya na itatao sa saindang mga empleyado tanganing makatabang sa pagpapamarhay kan saindang kamugtakan orog na haros gabos man an naapektaran kan Bagyong Kristine.
Sa ngunyan, padagos an programa kan nasambitan ng ahensiya na makakatabang sa mga paraoma partikularmente sa mga Irrigators sa bilog na Rehiyong Bikol.
