Inusisa ni Private Prosecutor Atty. James Bryan Ibrahim Alih an testigong si Atty. Karen Batu kan Office of the Ombudsman manungod sa mga idineklarang negosyo ni Vice President Sara Duterte kan saiyang enot na termino bilang alkalde kan Davao City.
Isinagibo an paghapot sa ika-25 aldaw kan impeachment trial kontra sa Bise Presidente.
Sinisiyasat ni Atty. Alih si Batu manungod sa acquisition cost o capital na nakalista sa Statements of Assets, Liabilities and Net Worth (SALNs) ni Duterte, partikular sa mga negosyong nag-eeksister na sa saiyang 2007 SALN.
Kinumpirma ni Batu na base sa tulong nakalistang dokumento, mayong idineklarang acquisition cost, rason tanganing tuyawon kan prosecutor na igwa nin negosyo alagad mayong nakalistang puhunan.
Ilinahad man kan testigo na mayong idineklarang stocks sa 2007 asin 2009 SALN ni Duterte, apwera sa 2008 SALN kun sain igwa nin nakalaag na stocks equity paid.
Kan liwat na hapoton kan prosecution kun boot sabihon kaini na igwa nin mga negosyo alagad mayong idineklarang puhunan o kapital, sinabi ni Batu na iyan an mismong nakasaad sa opisyal na dokumento kan Ombudsman.
An pahayag kan magkabilang lado parte kan presentasyon kan prosecution sa mga rekord kan Ombudsman sa irarom kan Article II kan impeachment case.
Nakasentro an nasabing akusasyon sa mga alegasyon nin dai maipaliwanag na kayamanan, salang deklarasyon sa SALN, asin an padagos na pakikipagsosyo sa negosyo mantang nasa pwesto sa gobyerno.
