Inaprubahan kan House of Representatives sa ikaduwang pagbasa an panukalang batas na magtatao nin kapangyarihan ki Pangulong Ferdinand “Bongbong” Marcos Jr. na paramientras na magsuspinde kan excise tax sa mga produktong petrolyo kun maglangkaw nang maray an presyo kan langis.
Sa irarom kan House Bill No. 8418, tuyo kan panukala na makatao nin tulos na kagianan sa mga namamanwaan, lalo na kun naglalangkaw an gastos sa transportasyon, pagkaon asin iba pang pangenot na babarakalon huli sa pagmahal kan langis sa pandaigdigang merkado.
Sigon sa mga awtor kan panukala, kaibanan si Ilocos Norte Rep. Sandro Marcos asin House Speaker Faustino “Bojie” Dy III, magseserbi ini bilang marikas na mekanismo kan gobyerno para masimbagan an grabeng paghiro kan presyo kan langis.
Sa panukala, puwedeng gamiton kan Pangulo an kapangyarihan kun umabot o lumampas sa $80 kada bariles an presyo kan Dubai crude oil sa sakop nin sarong bulan, o kun may idineklarar na state of national emergency o kalamidad na nagdudulot nin di pangkaraniwang pagtaas kan presyo kan petrolyo sa nasyon.
Puwedeng ganap na suspindihon o bahagyang bawasan an excise tax sa piling produktong petrolyo depende sa pagtaas kan presyo asin sa pangangaipo nin publiko.
May mga limitasyon man an kapangyarihan na ini. An suspensyon o pagbawas kan buwis puwedeng ipatupad nin hasta anum na bulan, asin dai lalampas sa sarong taon sa kabuuan, maliban kun palawigon kan Kongreso.
Kinakaipuhan man na mag-report an Pangulo sa Kongreso sa laog nin 15 aldaw pagkatapos kan kasuguan asin magtao nin bulanang report manungod sa epekto kaini sa presyo kan langis, inflation asin kita kan gobyerno.
Sigon man ki Marikina Rep. Miro Quimbo, chair kan House Committee on Ways and Means,igwang bastante na mga safeguard an panukala para maprotehiran an mga konsyumer mantang namamantiner man an katatagan kan pondo kan pamahalaan
Obheto man kaini na magkaigwa nin nakapreparar na lakdang an gobyerno kontra sa mga krisis sa pandaigdigang suplay kan langis.
