Nangapudan si Navotas Representative Toby Tiangco sa House of Representatives na iluwas an kumpletong detalye kan alokasyong pondo sa kada congressional district asin party-list antes an botohan para sa ratipikasyon kan 2026 General Appropriations Act sa Disyembre 29.
Sigun ki Tiangco, dae pwedeng mag boto an mga lehislador nin mayong malinaw na impormasyon kun pano binanga an badyet.
Soboot, importanteng masierto na mayong distritong may sobra-sobrang alokasyon, asin dae na mauutro an nangyari sa 2025 GAA kun saen may mga pondong inilaog nin dae aram kan representante kan distrito.
Mientrastanto, pighurot ni Batangas 1st District Rep. Leandro Leviste na dapat man na ibuyagyag an gabos kan inaapod na “allocables” asin “incentives” para sa mga kongresista sa irarom kan 2026 budget.
Sigun sa lehislador, may mga alokasyon soboot na gikan sa manlaen-laen na ahensya siring na sana kan DPWH, DOH, DSWD, DOLE, DA, NIA asin DepEd, apwera pa sa opisyal na nakabugtak sa mga dokumento.
Isiniwalat man ni Leviste na inalok soboot ini kan mga “incentives” karibay kan saiyang boto sa badyet. Hurot kaini, may karapatan an publiko na maaraman an gabos kan alokasyon asin insentibo antes na dagusang ratipikaron kan Kongreso an pambansang pondo sa 2026.
