Nagtiripon an duwang komite kan Kamara, kabali an mga pangenot na ahensya kan gobyerno asin mga representante diplomatiko, an tanganing repasuhon an pagigin andam kan nasyon na protehiran an pigkakarkulong 2.5 milyon na mga Overseas Filipino workers (OFWs) sa tahaw kan nag-oorog na iriwal sa mga parte kan Middle East.
An pagdangog pinangenotan kan House Committee on Foreign Affairs asin kan Committee on Overseas Workers Affairs, na pinag-olayan an mga lakdang kan gobyerno enkaso maggrabe an sitwasyon sa rehiyon.
Nag-atender sa hearing an mga opisyales gikan sa DFA, DMW, OWWA, DND, asin DBM, mantang an mga embahada asin konsulado kan Pilipinas sa Middle East nagtao nin mga briefing sa paagi nin virtual meetings.
Sinabi ni Pangasinan Rep. Maria Rachel Arenas na an naglalaad na giyera sa rehiyon nagdudulot nin dakulang peligro sa milyones na mga Pilipino duman. Pigduon man kaini na prayoridad kan administrasyon ni Presidente Ferdinand Marcos Jr an kaligtasan kan mga Pilipino sa conflict zones.
Kabale sa pinag-olayan iyo an posibleng paggamit kan P2-billion na action fund, contingency plans for evacuation sa paagi nin daga o kadagatan, asin asistensya para sa mga OFWs na magdadanay sa saindang host countries.
Mientrastanto, nanindugan man si Agimat Party-list Rep. Bryan Revilla sa tulos na aksyon kan gobyerno para masierto an kaligtasan kan mga OFWs na posibleng madakop sa iriwal.
Kulang suboot an mga pangako asin kaipuhan na sundan nin marikas asin kongkretong lakdang ngani na maprotehiran an mga Pinoy na nagtatrabaho sa abroad
