Pigtawan duon kan kampo kan mga nagsunad nin ikatulong impeachment case laban ki VP Sara Duterte na mayong halong politika an pagsunad ninda nin reklamo.
Marurumdumang ginibo kan grupo nin mga padi asin abogado an pagsusumiter nin complaint kan nakalihis na aldaw o antes an bakasyon kan mga kongresista.
Segun pa ki Atty. Amando Virgil Ligutan, lead counsel kan grupo, an mga tawong nagsunad nin impeachment iyo an mga padi na sibot sa kadakol na bagay, alagad tuyong pighanapan nin paagi tangani sanang makapagsumiter kan saindang petisyon.
Hurot ni Ligutan, dae dapat tawan nin kulay politika an saindang impeachment case asin nagkakanigo na hilingon na sana an gabat kan mga argumento sa kaso.
Kaya man naglalaom an mga ini na gibuhan nin paagi kan mga lehislador an paghiling sa reklamo, huli sa seryosong bagay ini na dapat na masimbagan.
Nagtutubod si Ligutan na kun gigibuhan nin paagi kan mga lehislador, kakayanon ini na mahimay asin matapos sa orog na marikas na panahon.
Padagos pa man na pighahalat an simbag kan kampo kan bise presidente.
