NAGA CITY- Pigpahimutikan kan kampo ni Bamban, Tarlac Mayor Alice Guo an koneksyon kan alkalde sa Chinese passport holder na si Guo Hua Ping na sigun ki Senator Sherwin Gatchalian an posibleng si Mayor Guo man.
Sigun sa abogado ni Mayor Guo na si Atty. Stephen David, kadakol nin mga tao an igwa nin pangaran na Guo Hua Ping kaya pig-enkaminar kaini an Senador na ipresentar sa proper forum kun igwa ining matibay na ebidensiya na sasarong tao sana an Chinese na si Guo Hua Ping asin Mayor Guo.
Sinaysay man kaini na dipisil simbagon an nasambitan ng isyu na pig-apod kaining publicity.
Kun marurumduman, iprenisentar ni Sen. Gatchalian kan aldaw nin Martes an mga rekord gikan sa Board of Investments kan aplikasyon kan pamilya Guo para sa Special Investors Resident Visa (SIRV).
Nagluluwas sa mga dokumento na nag-abot sa nasyon si Guo Hua Ping kan Enero 12, 2003 sa edad na 13 anyos pa sana. Nakalaog na an tunay na petsa kan pakamundang kaini an kan Agosto 31 kan taong 1990.
Ipigbuyagyag man ni Sen. Gatchalian na an nakarehistrong ina ni Guo Hua Ping para sa nasambitan ng Special Investors Resident Visa an si Lin Wenyi na naenot ng pinagsuspetsiyahang tunay na ina ni Mayor Guo.
Sa lado man kan Alkalde, enot na ining pinahimutikan an alegasyon na an Chinese national na si Lin Wenyo an saiyang ina asin tinawan-duon na si Amelia Leal an saiyang biological mother.
