NAGA CITY– Mas naglangkaw pa an kumpiyansa kan kampo ni Bise Presidente Leni Robredo na haros magigin pareho an resulta kan nakaaging 2016 May Elections sa nagpapadagos na manual recount kan Presidential Electoral Tribunal (PET).
Makalihis ini kan pagtao nin doon kan Commission on Elections (COMELEC) dapit sa 25% shading threshold na saindang ginamit kan nakaaging pirilian.
Sa entrevista kan Bombo Radyo Naga ki Atty. Barry Gutierrez, hale sa kampo kan bise presidente, sinaysay kaini na kinaogma ninda an pagsorog kan Comelec sa haloy na nindang kamawotan na ikonsidera kan mga revisors kan PET an 25% o 1/4 na shading sa mga balota sa manual recount katakod kan electoral protest na sinampa ni dating Sen. Bongbong Marcos.
Enot igdi, sigun sa Comelec, 25% shading threshold an saindang ginamit kan nakaaging 2016 elections tanganing marehistro pa suboot sa mga vote counting machines an mga boto sa ibong kan 1/4 na oval sa balota na namarkahan kan mga botante.
Huli igdi, pigtulod kan kampo ni Robredo na mayong katotohanan an mga naenot nang pahayag kan kampo ni Marcos dapit sa pagkontra sa 25% shading threshold na polisiya kan Comelec.
Naglalaom an kampo kan bise presidente na magigin ‘accurate’ an resulta kan nakaaging pirilian sa magigin resulta kan manual recount kan PET sa tolo na pilot provinces kabale na an Camarines Sur, Iloilo asin Negros Oriental tanganing dagos nang ibasura an protesta ni Marcos.
