NAGA CITY- Aminado ngunian si Vice President Leni Robredo na nahahandal na siya sa sitwasyon ngunian sa Kuwait kan mga Overseas Filipino Workers (OFW’s) makalihis an nangyaring makangirhat na paggadan ki Ilongga OFW na si Joana Demafeliz.
Ini an sinaysay ni Vice President Leni Robredo sa saiyang paghampang sa mga kagawad kan media sa ciudad nin Naga.
Sigon sa Bicolanang Bise Presidente, kinakaipuhan nang magkaigwa nin polisiya an gobyerno nin mga Recruitment Agency na masalo sa mga employee tanganing dai na ini maarog pa sa nangyari ki Demafeliz.
Napag aramang dakol na recruitment agencies an nagsasara asin pinapabayaan an saindang mga employee na saro sa mga nagigin rason tanganing mayo ining madalaganan enkaso inaabuso kan saindang mga amo.
Meintrastanto, mawot man suboot kan gobyerno na matapos na muna an pag urulay kan duwang nasyun manungod sa nasambitan ng isyu antes ining liwat na magpadara nin mga pinoy workers sa nasambitan ng nasyun.
Ini tangning magkaigwa suboot nin bastanteng proteksyon an mga Pinoy sa ano mang pang aabusong pwedeng sapuon sa kamot kan saindang mga amo sa nasambitan ng nasyun.
Kun marurumduman, nakikipagtumabangan na man an Office of the Vice President sa Overseas Workers Welfare Administration (OWWA) para masiyerto an marikas na proseso kan pagpirma sa bilateral agreement sa tahaw kan nasyung Kuwait asin Pilipinas.
