Nagpakol na sa labi sa P2.93 bilyon an danyos na dara kan magkakasunod na bagyo sa sektor kan agrikultura sa nasyon.
Sigun ini sa report kan Department of Agriculture Disaster Risk Reduction and Management Operations Center kung saen pinagtiripon-tipon an danyos nadara kan bagyong Mirasol, Super Typhoon Nando, Severe Tropical Typhoon Opong, asin an mga pag-uran na dara kan hanging habagat.
Dakulang parte kan danyos an naikurit sa rice industry. Sigun sa datos kan DA, maabot sa 102,000 na mga paraoma an apektado, mantang an hewas kan danyos sakop an kabilogang na 84,267 ektarya nin mga oma.
An magkasunod na mga bagyo iyo man an nagin kawsa kan pagkaraot kan kabilogan na 213,164 metriko tonelada (MT) kan mga agricultural products.
Piglalaoman na mas madudugangan pa an nasambitan na kantidad mantang nagpapadagos pa an monitoring asin validation kan danyos na dara kan bagyong Paolo na nanlamasa sa Northern Luzon.
Dugang pa kan DA-DRRMO, nagpakol na sa P424.78 million an kabilogang kantidad kan indemnification na itatao sa mga paraoma na naenot na makapagpaseguro kan saindang mga pananom antes magtama an bagyo, basado sa datos kan Philippine Crop Insurance Corporation (PCIC).
Papakinabang ini kan labi 43,000 insured farmers.
