NAGA CITY- Nangapudan sa mga deboto an sarong Kapitan sa siyudad nin Naga na dae maggapo nin bote na igwang laog na kwarta sa fluvial procession ngunyan na petso 20 kan Setyembre sa presenteng taon.
Sa entrevista kan Bombo Radyo Naga ki Efren Nepomoceno, Kapitan Barangay San Francisco, Naga City, sinaysay kaini na kan nakalihis na taon kadakol an mga deboto na naggapo nin bote na igwang laog na kwarta kun saen nagpainutan an mga voyadores sa pagkua kaini.
Katakod digde, tangani soboot na mamantinir an katuninongan asin pagrespeto sa Inang Peñafrancia kaipuhan na likayan an nasambitan ng aksyon.
Pigsierto man kan opisyal na liwat an presensiya kan saindang grupo sa maabot na fluvial procession kaibahan an PNP asin an Philippine Coast Guard sa kalabaan kan salog puon Panganiban hasta Colgante Brigde.
Dugang pa ni Nepomoceno, para sa mga deboto na maatender kan fluvial procession, kaipuhan na magtabang an mga ini na magin marhay an aktibadad asin ipahiling an hararom na debosyon sa paagi kan pag respeto.
Pig-aabisuhan man an gabos na dae na magdara kan mga bagay na dae man kaipuhan sa nasambitan na aktibad tanganing makalikay sa anuman na katibaadan.
