Pigbuyagyag kan ama kan bride na si Dennis Padilla na dikit pang dae madagos an seremonyas sarong aldaw makalihis an kasal ninda Claudia Barretto asin Basti Lorenzo kan nakalihis na Abril 8.
Sa sarong entrevista sa vlog kan aldaw nin Miyerkules, Abril 9, pig storya ni Dennis an emosyonal na apod na naresiber kaini gikan sa aki sa mismong aldaw kan kasal.
Sigun ki Dennis, bandang alas-8 nin pagkaaga, nagpadara nin mensahe ki Claudia tagani ipahayag an saiyang kaogmahan para sa nararani na pagpapakasal kan aki.
Alagad makalihis sana soboot an duwang minuto, nag apod si Claudia, naghihibi asin pigsabing dae na madadagos an nasambitan ng kasal.
Pigheras man ni Dennis na inamin ni Claudia an saiyang pagdududa sa kasal dara kan haros kakulangan nin interes ni Basti sa preparasyon kaining mga nakalihis na aldaw.
Makalihis an nasambitan ng apod, tulos man na pig-apudan ni Dennis an saiyang ina tangani sabihong dae na kaipuhan na magsangli para sa kasal.
Alagad makalihis man an haros sarong oras, liwat na nag contact si Claudia tangani bawion an naenot na desisyon.
Huli man sa pagkaapurado, tulos soboot ining nagpasiring sa Caloocan tangani sunduon an saiyang ina asin man sabay na magpasiring sa St. James The Great Parish sa Alabang, kun saen pigkundusir an seremonya.
Amay soboot sindang nakaabot sa simbahan asin nakapag-picture taking pa kaiba an tugang ni Dennis na si Gene Padilla.
Bagaman dae malinaw an tunay na rason kan pagduduwa-duwa ni Claudia, sinabi ni Dennis na posibleng ini an parte na sana kan ”wedding jitters” o takot sa paglaog sa bagong yugto kan buhay.
Sa parehong entrevista, piggirumdom man ni Dennis an enot na beses na nabisto kaini si Basti kan nakalihis na March 18. Sigun sa saiya, tuninong soboot si Basti asin man haros ”one question, one answer” sana an nagin pakikipag-ulay kaini sa saiya. Siringpaman, sinabi kaining naiintindihan kaini an personalidad kan nobyo kan aki.
Sa ibong man kan nagin tensyon, matrayumpo na nairaos an kasal ninda Claudia asin Basti, na ngunyan ay opisyal nang mag-agom.
