NAGA CITY – Igwa na nin naiirehistrong kaso nin dengue an pamayuhan kan banwaan kan Camaligan, Camarines Sur.
Sa entrevista kan Bombo Radyo Naga ki Dr. Francisco B. Severo IV, M.D – Municipal Health Officer 2, Camaligan, Camarines Sur, sinaysay kaini na an mga naino-note na mga kaso iyo an mga dae pa man severe cases.
Sa presente igwa sinda nin pigmomonitor na pasyente, sarong aking 3 anyos sa sarong brgy sa nasambitan ng banwaan alagad pigsierto ninda na naimamanehar man nin maayos. An nasambitan ng kondisyon an dae pa man kaipuhan na i-admit sa ospital algad kaipuhan na bantayan an platelet kun enkaso man na magbaba, saka na ini irerefer para sa pagbulong.
Sigun ki Severo, padagos an saindang pagtaong pagirumdom sa saindang lugar orog na ngunyan na nakaka eksperyensya nin pag uuran na kun saen yaon an presensya man kan mga helang na mga wild diseases siring kan water born infection na nakukua sa mga nakakakan o naiinom, influenza like diseases, leptospirosis asin an dengue.
Saro sa dapat na bantayan na sintomas kan helang na dengue iyo an trangkaso, pagkulog kan payo, rashes na nagbubutwa sa lawas kan infected na indbidwal, asin an mga severe forms na nose bleeding, pagkulog kan tulak na kun saen, sa puntong ini dapat nang mairefer sa ospital asin ipakonsulta tulos.
Sigun pa sa opisyal, dakulang katabangan an machine sa Rural Health Unit sa lugar na pang diagnose sa pag tetest kun positive sa nasambitan ng helang, sa paagi kaini tulos na maaaraman kun talagang infected an sarong pasyente o dae.
Pigtawan linaw pa kaini na tangani malikayan an helang kaipuhan sana na ipractice an regular na paglilinig sa kapalibutan, paghahali kan mga tambak na tubig sa laog asin luwas kan mga harong tanganing mawara an mga breeding grounds kan lamok.
Sa ngunyan, pagirumdom pa ni Severo na magin preparado sana an mga kahimanwa orog na sa pabago bagong panahon, na kun sain laoman an mga siring na helang na pwedeng makua oras na magpabaya.
