Bahagyang naglangkaw an mga kaso kan dinadapuan kan helang na dengue sa nasyon kan nakalihis na bulan nin Hulyo kan presenteng taon.
Basado sa datos kan Department of Health (DOH), naobserbaran an paglobo kan kaso kan dengue sa 15,091 gikan Hulyo 13 hasta Hulyo 26, na duwang semanang pananalasa kan magkakasunod na bagyong Crising, Dante asin Emong na sinabayan pa kan epekto kan hanging habagat.
Mas halangkaw ini nin pitong porsyento gikan sa nairehistrong kaso kan nakalihis na Hunyo 29 hasta Hulyo 12 na nagpakol sa 14,131.
Sa ibong man kaini, naka-alerto an ahensiya sa mga kaso nin dengue sa nasyon asin nagtitinir na aktibo man an dengue fastlanes sa mga ospital kan DOH.
Padagos man pinagiingat kan ahensiya an publiko laban sa helang sa paagi kan paglilinig sa mga lugar na pwedeng mapag-ipunan nin tubig na pwedeng pag sugukan nin lamok na nagkukuriyat nin dengue.
Abiso man kan ahensiya na kun maka-eksperyesnya man nin kalintura sa laog kan duwang aldaw asin makamati nin sintomas siring kan pantal, pangkukulog nin lawas o kalamnan asin mata, pagkahilo, asin pagsusuka an tulos na magpakonsulta sa health center o sa dengue fast lanes.
