Naglobo pa nin 56% an mga kaso kan dengue sa Pilipinas susog sa Department of Health (DOH).
Basado sa datos kan ahensiya, naglangkaw sa kabilogang 43,732 kaso an nairehistro gikan Enero hasta sa Pebrero 15 kan presenteng taon.
Sa ibong man kan nakakaalarmang paglangkaw kan numero kan mga dinadapuan nin helang, sinabi kan ahensiya na mas hababa pa man an presenteng case fatality ratio na 0.38%, bumaba ini gikan sa 0.42% kan nakalihis na taon.
Katakod kaini, pinahigot man kan DOH an dengue control measures kaini asin mahigot na nakikipagtabangan sa mga local na gobyerno tangani na malabanan an outbreak kan dengue sa kadaklan nin mga apektadong rehiyon susog sa pangapudan ni Presidente Ferdinand Marcos Jr. para sa tulos na aksiyon.
Sa sarong statement, pigtukoy kan DOH na nahilingan nin halangkaw na kaso kan dengue sa 3 rehiyon sa nasyon na katampad kan labi sa kabanga nin mga kaso sa bilog na Pilipinas. Ini man an sa CALABARZON na may 9,113 cases, National Capital Region na may 7,551 cases asin Central Luzon na may 7,362 cases.
An 17 lokal na gobyerno sa nabanggit na mga rehiyon ay ang mga dengue hotspots.
Sa ibong man soboot kan kabilogan na paglangkaw nin kaso, nagluluwas sa datos kan DOH na nagbaba nin 5% an mga bagong kaso sa nakalihis na 4 na semana.
Nakaambag soboot digde an mga kampaniya sa pagpapalangkaw nin kamalayan kan publiko sa helang, pinahigot pang paglilinig sa kapalibutan asin pagpuksa sa mga pig iistaran kan mga lamok na nagdadara nin helang na dengue.
