Sa tahaw kan makusog na uran asin pagbaha sa pirang parte kan Metro Manila, liwat nagpagirumdom an Department of Health (DOH) sa publiko na mag-ingat kontra leptospirosis.
Sigun ki Health Secretary Teodoro Herbosa, hasta kaya, likayan an paglusong sa baha alagad enkaso kinakaipohan talaga, an tulos maghugas nin lawas pagkatapos.
Pigrekomendar man kan sekretaryo na tulos magkonsulta sa doktor o health center sa laog nin saro hasta duwang aldaw.
Sa pinakahuring datos kan DOH, 3,785 na an kaso kan leptospirosis sa nasyon ngunyan na taon na bahagyang mas naglangkaw kumparar sa 3,605 na nairehistro kan nakalihis na taon.
Kan Hulyo 21 man hasta Agosto 3, nagpakol sa labi sarong ribo an naikurit na bagong kaso huli sa panlalamasa kan Bagyong Carina asin habagat.
Sigun pa sa DOH, enkaso dae maglikay an publiko. posibleng magsikad liwat an mga kaso kan leptospirosis huli sa pagbahang kawsa kan Bagyong Enteng.
