NAGA CITY – OROG pang naglangkaw an kaso kan libel asin online money scam sa probinsiya kan Camarines Sur.
Sa entrevista kan Bombo Radyo Naga ki PLTCol. Angelo Babagay, Camarines Sur PNP Anti-Cyber Crime Unit, sinaysay kaini na sa mga nakalihis na bulan sa paglaog kan taong 2024, dae man nagbaba an kaso kan libel asin scam sa nasambitan ng probinsiya kundi orog pa ining naglangkaw sa 5%. Sigun pa ki Babagay, igwa sindang narereseber na complaint ara-aldaw kun saen nangengenot digde an libelo asin stafa.
Katakod kaini, nangyayari soboot an libel kun enkaso pig-aagi sa social media an mga iwal o dae pagkaka-irintindihan kan nagkapirang mga indibidwal na nag-aabot na sa punto kan demandahan.
Mantang para man sa online scam, ini an nangyayari kun enkaso an iba man na mga tawo an igwang utang na dae nababayadan sa mga online lending an pigpapadarahan na ini nin mga pananakot.
An iba man nangyayari sa paagi kan pagha-hack kan mga messenger o gcash na an obheto an makapangbiktima asin makawartahan an iba.
Dugang pa kan opisyal an siisay man na mapatotoohan na nagbalgar o imbwelto sa siring na pagbalgar sa mga pigpapautob na ley an mahahampang sa magkakanigong kapadusahan asin penalidad.
Sa ngunyan, pinagirumduman na sana kan opisyal an gabos na an anuman na iwal o problema sa ibang tawo an dae na pagdarahon pa sa social media asin an pagigin matalino sa pagdedesisyon sa buhay tanganing malikayan man na mabugtak sa alanganin na sitwasyon.
