Nagpakol na sa 63 an nairehistrong mga kaso kan “Super Flu” sa nasyon basado sa pinakabagong datos kan Department of Health (DOH).
Sigun ki Health Spokesperson Albert Domingo, an datos na ini nairehistro kan Disyembre asin piglinaw na an ‘super flu’ sarong variant kan influenza A o trangkaso asin pigtawan duon na bako na ini bagong helang.
Paliwanag pa ni Domingo, an sintomas kan super flu mayong pinagkaiba sa mga sintomas kan trangkaso siring kan pagkakaigwa nin abo, sipon, kalintura asin pangungulog kan hawak.
Sa ibong kaini pigtawan duon man kan kagawaran na kadakli talagang naglalangkaw an kaso kan mga respiratory infections sa mga panahon na ini huli na man sa pagbabago kan panahon.
Pigtawan linaw man ni Domingo ngunyan Enero dakula pa man an posibilidad kan pagkakaigwa nin pagbabago sa panahon kaya posible man magkaigwa nin irritation sa dungo asin halunan an publiko.
Mientrastanto, pig-enkaminar man kan DOH an publiko na magsulot nin face masks komo proteksyon asin pagiingat sa siring na mga sitwasyon asin dae buot sabihon na naglala o infectious an pagkakaigwa nin flu.
