NAGA CITY – Paglangkaw kan kaso kan mga online-scam ngunyan na holiday season posible.
Sa entrevista kan Bombo Radyo Naga ki PCPT Angelo Babagay, Team Leader kan Camarines Sur Anti-Cybercrime Response Team pigbuyagyag kaining p-pwedeng magin trend kan pang-iiscam an bookings orog na pag holiday season huli kadaklan sa mga tawo an nagpapasiring sa mga hotel.
Kaya kahagadan kaini ngunyan na holiday season na siertuhon an kredibilidad kan kaulay magin an establishmento na pig-ooffer sa sainda.
Siring man sa mga Transportation na nagpapa booking online dakula an posibilidad na magsabay digde an mga scammer kaya likayan muna an pagbabayad tolos asin mas marhay kun personal na sana an pagbabayad kan ticket orog na ngunyan na holiday season.
An halimbawa kan mga scam iyo an mga links na basta-basta sana pigpipindot na lingid sa kaaraman tolos na palan nag gegenerate sa mga e-wallets platform.
Ngunyan na taon nakapagrehistro nin nasa 119 na reported cases kan financial scam sa mga e-wallets asin nahihilingan man kaining rason an kakulangan sa awareness kun kaya naglalangkaw an mga siring kaining kaso asin an mga scammers matitibay magtaram tanganing sana mapatubod an kaulay.
Kun kaya pagirumdom ni Babagay sa publiko na magin segurista sa mga online transaction pag-abot sa kwarta, para sa kaaraman kan gabos na an bangko dae man basta-basta nag-aapod.
Alagad piglalaoman man kaini an paglangkaw kan online scam huli sa dae malilikayan kan publiko ngunyan na holiday season an mga online transaction.
