Nagtutubod si International Criminal Court (ICC) Assistant to Counsel Kristina Conti na may 80% na mausad na an kaso ni dating Presidente Rodrigo Duterte pasiring sa paglilitis.
Ini an kasunod kan desisyon kan international tribunal sa isyu nin hurisdiksyon kaining imbestigaran an drug war na ipinautob kan nakalihis na administrasyon.
Sigun ki Conti, an bagong desisyon kan ICC an sarong malinaw na sinyales kan pagpapadagos kan imbestigasyon tangani dagusang matukoy kun siisay an iba pang perpetrator o kaiba kan dating Presidente sa pagpapautob kan madugong drug war.
Ini man soboot an hudyat para sa posibleng pag-aaply kan dugang na warrant of arrest kontra sa iba pang personalidad.
Hurot ni Conti, kun igwa man na masunod na maaarestar siring ni Sen. Ronald Dela Rosa, mas makakamaray soboot kun tulos ining maisasakatuparan.
Inabisuhan man kan abogado an Senador na isuko na sana muna kaini an saiyang sadiri sa hurisdiksyon kan korte asin kuwestyunon ini sa merito kan kasong ihahampang sa saiya.
Pwede soboot gibuhon ini kan Senador, orog na kun plano man kan kampo kaining kuwestyunon an mga warrant na posibleng iniluwas na o iluluwas pa sana kan international tribunal.
