NAGA CITY- Tinawan duon kan sarong abogado na an pagsusunad nin reklamo o kaso sa barangay an para sana sa mga indibidwal asin dae digdi pupwede an mga reklamo sa mga korporasyon, problema sa gobierno o sa mga ahensya kan gobierno.
Sa entrevista kan Bombo Radyo Naga ki Atty. Ralph Sarmiento, Dean kan College of Law sa University of St. La Salle, sinaysay kaini na magin an mga reklamo para sa sarong public official orog na kun dapit an sa saiyang duties, responsibilities asin functions an dae man giraray pigrerequired na mag-agi sa barangay.
Piglinaw man ni Sarmiento na sa pagsusunad nin kaso sa barangay, tutugutan ini kan ley kun an ipapabarangay an ka-barangay kan nagrereklamo, gikan sa ibang barangay sa laog kan saindang munisipalidad, adjacent o magkataid an mga ini orog na kun gikan sa magkaibang banwaan o syudad, asin kun matugot an complainant na magsunad nin reklamo sa lugar o barangay kan saiyang pigrereklamo.
Paglilinaw pa ni Sarmiento, dae pupwedeng magsunad nin reklamo an sarong complainant kun an saiyang pigrereklamo an nakaistar sa luwas kan saindang lugar.
