NAGA CITY- Kinokonsiderar ngonyan kan Naga City Healty Office na sarong major public health concern an nairehistrong halangkaw na numero kan kaso nin helang na dengue sa nagkapirang barangay sa ciudad.
Sa entrevista kan Bombo Radyo Naga ki Dr. Jophramel Paz, assistant health officer kan ciudad, sinaysay kaini na mahigot an saindang ginigibong monitoring sa 27 mga barangay sa ciudad urog na sa mga lugar na igwang halangkaw na kaso nin dengue.
Basado suboot sa kapot na datos kan saindang opisina poon kan Enero hasta Setyembre, mas halangkaw an kaso kan nasambitang helang ngonyan na taon kun ikukumparar ini kan taong 2016.
Napag-araman na an barangay Cararayan an igwa nin pinakahalangkaw na kaso kan dengue na nagpakol na sa 51 asin duwang persona na an kumpirmadong binawian nin buhay sa lugar.
Tinawan doon ni Paz na importante na mamantenir an kalinigan sa laog asin palibot kan harong para masierto na mayong mga namok na nagdadara nin virus na dengue sa nasambitang ciudad.
