(UPDATE) NAGA CITY- Nilalaoman na madudugangan pa an kasong kinakahampang kan dating konsehal asin kan esposa kaini na imbwelto sa estafa sa Camarines Sur.
Sa entrevista kan Bombo Radyo Naga ki PC/Insp. Ronnie Fabia, chief kan Criminal Investigation and Detection Group (CIDG) Camarines Sur, sinaysay kaini na nagkapirang mga indibidwal na an nagpasiring sa saindang opisina tanganing magsangat nin reklamo laban sa suspek na si Nestor Avenido asin sa esposa kaini.
Nilalaoman suboot ninda na madudugangan pa an 47 mga arrest warrant na naiserbe na sa mag-agom na Avenido.
Sigon ki Fabia, naarestar an mga suspek makalihis na magpasiring sa headquarters kan CIDG sa Kampo Krame an mag-agom na nabiktima kan mga ini.
Sinaysay man ni Fabia na madidipisilan na makalibre an mag-agom na Avenido huli sa nahahampang ini sa kasong syndicated estafa asin estafa na mayong nirerekomendar na pyansa.
Nangapodan man an mga otoridad sa mga nabiktima kan mag-agom na Avenido na magpasiring sa hepatura kan mga otoridad tanganing masangatan nin maninigong kaso an nasambitang mga suspetsado.
