Tinukoy ni Department of Economy, Planning and Development (DepDev) Secretary Arsenio Balisacan na saro sa rason kan pagigin talamak kan mga ghost asin substandard flood control projects iyo an kawaran nin monitoring asin evaluation kan mga proyekto.
Sa pagdangog kan budget kan DepDev sa Senado, sinaysay ni Balisacan na makalihis kan termino ni dating Presidente Noynoy Aquino kan 2015, pinauntok na an pagpopondo sa monitoring asin evaluation kan mga proyekto kan NEDA.
Nakatabang an mga pag-aadal tangani masierto an kalidad kan mga imprastraktura asin programa.
Hasta ngunyan, mayong pagtataong suporta para sa mga pag-aadal na naggigibo nin impact assessment asin monitoring assessment kan mga natapos asin ongoing na proyekto rason kaya nauutro sana an mga pagkakasala.
Pighurot pa ni Balisacan na dae naman mahal an pagsasagibo nin monitoring asin evaluation asin katunayan, kadakol na mahuhusay na unibersidad sa bilog na nasyon na pwedeng magin katabang kan mga research institutions sa pag-aadal tangani malikyan an pagkasayang kan mga programa asin proyekto.
