Binadil an self-confessed drug lord na si Rolan ‘Kerwin’ Espinosa kan, Huwebes, Abril 10, 2025, mantang nagtatao nin mensahe sa saiyang pangangampanya sa Barangay Tinag-an Albuera, Leyte.
Ini an pigkumpirma ni Albuera Councilor aspirant Carl Kevin Batistis.
Basado sa impormasyon, nagtiripon an bilog na slate ni Espinosa sa sarong covered court kaiba an mga residente kan Barangay kan biglang mangyari an insidente.
Tulos na pigdara sa Ormoc Doctor Hospital si Espinosa pati naman an sarong menor de edad na nadamay sa insidente.
Sa ibong na lado si Espinosa an nag desisyon na magdalagan komo alkalde kontra ki incumbent Mayor Sixto Dela Victoria sa irarom kan partidong Bando Espinosa-Pundok Kausaban (BE-PK) party.
Nangyari an saiyang kandidatura makalihis ining mapalibre gikan sa kulongan kan ibasura kan Regional Trial Court sa Baybay City an kaso kotra sa saiya huli sa kakulangan nin ebidensya.
Marurumdonan, si Kerwin Espinosa an naging parte kan kontrobersiya kan 2016 kan ikonektar ini ni dating Presidente Rodrigo Duterte sa ilegal na kalakalan kan droga sa Eastern Visayas.
Inakusaran si Espinosa asin an saiyang ama na si Rolando Espinosa Sr., na kaidto alkalde kan Albuera, kan pagiging embwelto sa narcotics trade makalihis an sarong police raid kun saen nanutaran an P11 million na kantidad kan shabu harani sa saindang harong.
Nagsuko si Rolando Espinosa Sr., kan katahawi nin 2016 alagad dae naghaloy, nagadan sa laog kan karsel sa Baybay City Jail.
