NAGA CITY- Nagpuon na an Brigada Eskwela komo preparasyon sa nagdadangadang na pagpupuon kan klase kan maabot na Lunes, Hulyo 29, 2024 sa Barangay Concepcion Grande, Naga City.
Sa entrevista kan Bombo Radyo Naga ki Jerold Rito, kapitan kan nasambitan ng lugar, sinaysay kaini na presente man sa nasambitan ng aktibidad an iba pang personalidad tanganing magtaong tabang.
Labi man an pasasalamat kan opisyal huli ta “very cooperative” man an mga residentes sa saindang mga programa, huli digdi mas marekas nindang nagigibo an saindang mga katoyohan.
Magpapadagos man an saindang pagtataong asistensya sa mga eskwelahan hasta sa aldaw nin Sabado.
Katakod kaini, pangapudan man ni Rito sa mga magurang na magdara nin sadiri nindang gamit panlinig orog na ta mayo man nin ikakatao an eskwelahan.
Pangapudan man kan opisyal sa mga may marhay na boot na magmamawot na magdonar nin anuman na pupwedeng gamiton sa pagpapakarhay kan eskwelahan an taos puso man ninda na aakuon.
Sa ngunyan, hagad na sana kan opisyal an kooperasyon kan lambang saro para sa kasalbaduhan kan mga kaakian kasabay kan saindang pagbwelta sa eskwelahan.
