NAGA CITY – NAPANO nin wangwang kan mga firetruck kan bombero an mga tinampo sa syudad nin Naga kasabay kan pormal nang pagpupuon kan Fire Prevention Month ngunyan na aldaw, Marso 1, 2024.
Nakisumaro man an manlaen-laeng sektor sa pigsagibong aktibidad sa Plaza Quezon sa syudad kasubagong pagkaaga.
Nagsanib pwersa man an Bureau of Fire Protection Naga asin Camarines Sur kaibahan na an mga fire volunteer groups na Naga White asin Chin Po Tong sa kick-off ceremony sa syudad nin Naga.
Magpapadagos man an iba pang mga aktibidad katakod kan nasambitan ng event sa mga masunod na aldaw orog na an mga aktibidades na babalihan kan mga estudyante gikan sa manlaen-laeng eskwelahan sa syudad.
Kabali man sa mga ikokondusir an mga seminar na magtataong kaaraman sa lambang residentes dapit sa paglikay sa kasulo orog na ngunyan na summer season.
