Pighihiling na man kun igwa nin koneksyon sa espionage an kidnapping-slay case kan filipino-chinese businessman na si Anson Que asin man driver kaini na si Armanie Pabillo.
Sigun sa Anti-Money Laundering Council (AMLC), kumpirmadong an saro sa mga accounts na nakaresiber kan soboot ransom money an pagsadiri kan sarong Ni Qinhui.
Si Ni Quinhi an saro sa mga chinese national na inarestar kan National Bureau of Investigation (NBI) kan nakalihis na bulan nin Pebrero huli man sa pageespiya.
Sigun ki AMLC Director Emmett Manantan, an e-wallet na ini an saro sana sa mga key player o nakaresiber kan kwarta gikan sa junket operators na dapat an primary purpose an para sana sa mga gaming purposes.
Sigun ki Manantan, nahiling kan saindang ahensya na nagkaigwa nin exchanges sa pag ultanan kan mga e-wallets na ini na dapat pang magsairarom sa mas hararom pa na imbestigasyon.
Sa ibong kaini ay dae na muna kinumpirmar ni Philippine National Police (PNP) Chief PGen. Rommel Francisco Marbil na igwa talaga nin koneksyon an kidnapping-for-ransom operations kan mga suspek sa pangeespiya ni Qinhui.
Sigun ki Marbil, nahiling pa sana na nagagamit an mga account na ini para sa money laundering asin man iba pang mga iligal na aktibidad alagad sa ngunyan ay mayo pa soboot nin inaapod na correlation an duwang magkaibang insidente.
Dugang pa kan hepe, posible kaya an nagin paglaog kan kwarta sa account ni Quihui an saro sana na basehan na nagiitok an kwarta sa mga accounts na siring kaini tangani makagibo nin mga iligal na aktibidad siring kan pagpapakuriyat nin fake news, o kaya man an pagtao nin financial support sa paggibo kan espionage.
Makakatabang man soboot an pagbilog nin mas kadakol pa na mga ley asin man pagkakakusog nin regulasyon asin sistema kan nasyon orog na sa paggamit kan mga digital wallets tangani dae na ini magamit sa mga future illegal activities pa.
Mientrastanto, pinag-sierto kan AMLC, traceable an mga accounts orog na sa paagi kan mga tools gikan sa PNP-Anti-Cybercrime Group (PNP-ACG) kun saen natukoy ninda an 2 ribayan nin kwarta na iyong nakarehistro sa laog kan nasyon mantang nagkapira sa mga nagin exchanges an unregistered na sa Pilipinas na iyo man sarong dakulang challenge man para sa saindang padagos na pagtukoy sa money trail kan digital wallet na iyong ginamit sa proseso.
